Ölkəmiz aha bir mötəbər idman yarışına ev sahibliyini uğurla başa vurdu. Milli Gimnastika Arenasında təşkil olunan və dörd gün davam edən idman gimnastikası üzrə Dünya Kubokunda 30-dan çox ölkənin ən güclü gimnastları mübarizə aparıb.

Turnirdə ölkəmizi kişilər arasında Nikita Simonov, Aydın Əlizadə və Rəsul Əhmədzadə, qadınların mübarizəsində isə Dəniz Əliyeva və Nazənin Teymurova təmsil ediblər.

Proqrama uyğun olaraq, ilk iki gün təsnifat xarakteri daşıyıb, növbəti günlərdə isə həlledici final mərhələləri keçirilib. Gərgin keçən təsnifat mərhələsinin nəticələrinə əsasən, Nikita Simonov, Dəniz Əliyeva və Aydın Əlizadə finala yüksələrək ən güclü səkkizlikdə yer alıblar.

Final çıxışlarında gimnastlarımız mükafatçılar sırasına düşə bilməsələr də, yadda qalan performans nümayiş etdiriblər: Nikita Simonov yarışları 4-cü, Dəniz Əliyeva 6-cı, Aydın Əlizadə isə 8-ci pillədə başa vurub.