AFFA İntizam Komitəsinin növbəti iclası keçirilib və ölkə futbolundakı son oyunlarda baş verən qayda pozuntuları ilə bağlı bir sıra sərt qərarlar qəbul edilib.
Ölkə kubokunun 1/4 final mərhələsinin “Kəpəz”lə ilk oyununda baş verən hadisələrə görə “Turan-Tovuz” ümumilikdə 12 500 manat məbləğində cərimələnib. Baş məşqçi Qurban Berdiyev dördüncü hakimi itələdiyinə görə birbaşa qırmızı vərəqə alıb və hakimləri təhqir etdiyi üçün 4 oyunluq diskvalifikasiya edilib. Klub bu hərəkətə görə 10 000 manat cərimə ödəyəcək.
Etirazlara görə ikinci sarı vərəqə alaraq meydandan qovulan digər məşqçi Yunis Hüseynov 1 oyunluq cəzalandırılıb və buna görə klub əlavə 2 500 manat cərimələnib.
Premyer Liqanın: intizam tədbirləri
“Araz-Naxçıvan”: “Sabah”la 19-cu tur oyununun vaxtından gec başlamasına (komandanın meydana gec çıxması) görə 3 000 manat, futbolçuların çoxsaylı sarı vərəqə almasına görə isə 700 manat cərimə kəsilib.
“Sabah”: Reqlament pozuntusuna görə klub maliyyə sanksiyasına məruz qalıb.
“Zirə”: “Sumqayıt”la matçda 5 və 25 nömrəli futbolçuların şortlarındakı nömrələrin uyğunsuzluğu səbəbindən klub 1 500 manat cərimələnib.
“Qarabağ“: “Şamaxı” ilə oyunda sarı vərəqə limitin aşılması üçün 700 manat cərimə tətbiq edilib. Həmçinin, Ağdam təmsilçisi Şamaxı şəhər stadionunda azarkeşlərin sındırdığı 25 oturacağın dəyərini ödəməli olacaq.
“Neftçi”: “Qəbələ” ilə görüşdə müdafiəçi Elvin Bədəlov ikinci sarıdan qırmızı vərəqə aldığı üçün 1 oyunluq cəzalandırılıb, klub isə 500 manat cərimələnib.“Qəbələ”: “Sabah”la oyuna təyin olunan vaxtdan gec gəldiyi üçün kluba xəbərdarlıq edilib.