Fransanın paytaxtında cüdo üzrə keçirilən nüfuzlu Paris Grand Slam turniri davam edir. Yarışın ikinci günündə Azərbaycan milli komandasının daha 5 üzvü mübarizəyə qoşulub. Gərgin keçən qarşılaşmaların yekununda bir cüdoçumuz medallar uğrunda həlledici mərhələyə adlaya bilib.
81 kq çəki dərəcəsində mübarizə aparan Zelim Tskayev günün ən uğurlu performansını sərgiləyib. O, ardıcıl olaraq – Cianqan Vanq (Çin), Laxlan Murhed (Böyük Britaniya) və Abubakr Şerovu (Tacikistan) məğlub edib. Bu qələbələrdən sonra yarımfinala yüksələn idmançımız finala gedən yolda qazaxıstanlı Abulayxan Jubanazar ilə qarşılaşacaq.
Eyni çəki dərəcəsində çıxış edən digər cüdoçumuz Vüsal Qələndərzadə ilk görüşündə ukraynalı Mixaylo Svidrakı məğlub etsə də, 1/8 finalda yaponiyalı Yuhei Onoya uduzaraq yarışda çıxışını başa vurub.
Təmsilçilərimiz ağır çəki dərəcələrində çıxışları elə də uğurlu olmayıb.
Əjdər Bağırov (100 kq) rəqibi Denis Sedrik Nquyassa Bekainin (Mərkəzi Afrika Respublikası) tatamiyə çıxmaması səbəbindən birbaşa 1/8 finala yüksəlsə də, bu mərhələdə italiyalı Cennaro Pirelliyə məğlub olub.
Uşanqi Kokauri almaniyalı rəqibinə qalib gəlsə də, Kanta Nakanoya (Yaponiya) uduzub. Kənan Nəsibov isə startda avstriyalı cüdoçunu məğlub etsə də, kanadalı Con Messe Bessonqla görüşdə məğlubiyyətlə barışmalı olub.
Hazırda millimizin hesabında iki medal var və hər iki mükafat turnirin ilk günündə qazanılıb: Balabəy Ağayev (60 kq) çempion tituluna sahib olub, Ruslan Paşayev (66 kq) isə bürünc medal qazanıb.