“Sabah” üçün Çempionlar Liqasının liqa mərhələsində tamamilə fərqli səviyyədə sınaqlar başlayır. Qarşəda ölkə çempionunu qitənin nəhəng klubları gözləyir. “Mançester Yunayted”, “Barselona”, “Arsenal”, “Borussiya” Dortmund, “Napoli”, “Vilyarreal”, “Slaviya” və “Vikinq” kimi komandalarla qarşılaşmalar “Sabah” üçün həm böyük futbol məktəbi, həm də klub tarixinin ən ciddi imtahanı olacaq.

Bu rəqiblərin gücünü yalnız adları ilə qiymətləndirmək isə doğru olmaz. Çünki Avropanın aparıcı çempionatlarında mövsümün gedişi göstərir ki, böyük klubların da zəif nöqtələri var. Daxili çempionatların son turu “Sabah”ın rəqiblərinin hazırkı vəziyyəti barədə müəyyən təsəvvür yaradıb.

Ən parlaq nəticə “Barselona”dan gəlib. Kataloniya klubu “Valensiya”nı 5:0 hesabı ilə darmadağın edib. Oyunun böyük bölümündə rəqibinə heç bir şans verməyən “Barselona” hücum xəttindəki potensialını bir daha nümayiş etdirib. Lamin Yamalın dublu, Fermín Lopesin isə bir qol və iki məhsuldar ötürməsi komandanın fərdi keyfiyyətini ortaya qoyub.

Bu nəticə “Sabah” üçün kifayət qədər ciddi xəbərdarlıqdır. “Barselona”nın əsas təhlükəsi yalnız topa uzun müddət sahib olması deyil. Kataloniya klubunun hücumçuları kiçik boşluqları belə təhlükəli epizoda çevirmək iqtidarındadır. Təmsilçimi bu rəqiblə oyunda müdafiədə maksimum intizamlı olmalı, xüsusilə cərimə meydançası ətrafında boşluqlar verməməlidir.

“Arsenal” da son turda vacib qələbəyə imza atıb. London təmsilçisi “Çelsi”ni 2:1 hesabı ilə məğlub edib. Maraqlıdır ki, “Arsenal” görüşün əvvəlində hesabda geriyə düşüb, lakin sonradan oyunun gedişini dəyişməyi bacarıb. Bu, Mikel Artetanın komandasının xarakterini göstərən vacib məqamdır.

“Sabah” üçün “Arsenal”la bağlı əsas nəticə budur: rəqibə erkən zərbə vurmaq belə onun oyun planını dağıtmağa zəmanət vermir. İngiltərə klubu təzyiq altında özünü itirmir və oyuna nəzarəti yenidən ələ keçirməyi bacarır.

“Mançester Yunayted”də isə vəziyyət bir qədər fərqlidir. İngiltərə nəhəngi “Everton” səfərində 2:2 hesablı heç-heçə ilə dönüb. Daha maraqlısı odur ki, “Yunayted” 88-ci dəqiqədə 2:1 hesabı ilə önə keçməsinə baxmayaraq, matçın son saniyələrində qələbəni əldən verib.

Bu nəticə “Mançester Yunayted”in hazırkı vəziyyətində müəyyən qeyri-sabitliyin olduğunu göstərir. Komandanın hücum potensialı yüksək olsa da, üstünlüyü qorumaq və oyunun son bölümünü idarə etmək baxımından problemləri var. “Sabah” üçün bu, heç şübhəsiz, diqqətdə saxlanılmalı məqamdır.

Dortmund “Hoffenhaym”la səfər görüşündə 0:2 hesablı geridönüşdən sonra 3:2 qalib gəlib. Almaniya təmsilçisinin bu nəticəsi onun xarakterini göstərir. “Borussiya” məğlubiyyətə yaxın olduğu matçda oyunu dəyişməyi bacarıb.

Amma eyni qarşılaşma Dortmundun müdafiəsində sualların olduğunu da göstərdi. Komanda iki qol buraxıb və müəyyən mərhələdə rəqibin təzyiqi qarşısında çətinlik çəkib. Deməli, “Sabah” üçün Almaniya klubuna qarşı əsas imkanlardan biri sürətli hücumlar və müdafiə ilə hücum arasındakı keçidlər ola bilər.

“Napoli”nin son turu isə daha dramatik alınıb. Neapol klubu “İnter”ə qarşı oyunda 2:0 hesabı ilə önə çıxıb. Lakin bu üstünlük qələbə üçün kifayət etməyib. “İnter” geri dönüş edərək matçı 3:2 hesabı ilə qazanıb və “Napoli” son dəqiqələrdə məğlubiyyətlə üzləşib.

Bu qarşılaşma “Napoli”nin həm güclü, həm də zəif tərəflərini eyni anda göstərdi. Komanda hücumda kifayət qədər təhlükəlidir və iki qol vuraraq üstünlük qazana bilir. Lakin hesabı qorumaq və oyunun son bölümündə müdafiə intizamını saxlamaq məsələsində problemlər yaşayır. “Sabah” üçün isə bu, ümidverici məqamdır.

“Vilyarreal”ın son turdakı vəziyyəti isə daha çox sual doğurur. İspaniya klubu doğma meydanda “Deportivo”ya 2:3 hesabı ilə uduzub. “Vilyarreal” hesabı açmasına baxmayaraq, üstünlüyünü qoruya bilməyib və ikinci hissədə rəqibinin təzyiqinə tab gətirməyib.

İspaniya təmsilçisinin mövsümün əvvəlindəki nəticələri də sabitlik probleminə işarə edir. Bu baxımdan “Vilyarreal” “Sabah”ın səkkiz rəqibi arasında xal qazanmaq baxımından daha real görünən komandalardan biridir. Təbii ki, bunun üçün Dambrauskasın komandası rəqibin müdafiəsindəki boşluqlardan maksimum istifadə etməlidir.

“Slaviya” isə əksinə, son turda gücünü nümayiş etdirib. Praqa təmsilçisi “Brno”nu 4:0 hesabı ilə darmadağın edib. Bu nəticədən əvvəl “Slaviya” prinsipial Praqa derbisində “Sparta”nı 3:0 hesabı ilə məğlub etmişdi. Deməli, Çexiya çempionu hazırda yaxşı formada olan komandalardan biridir.

“Slaviya”nın təhlükəsi ondadır ki, onun adı Avropanın ən böyük klubları qədər parlaq görünməsə də, meydanda kifayət qədər intizamlı və aqressiv futbol nümayiş etdirir. “Sabah” bu rəqibi qiymətləndirməsə, ciddi problemlə üzləşə bilər.

Norveçin “Vikinq”i də oxşar kateqoriyaya daxildir. Komanda son turda “Sandefyord”la 1:1 hesablı heç-heçə etsə də, Norveç çempionatında yüksək mövqedədir. Üstəlik, “Vikinq” Çempionlar Liqasının təsnifat mərhələsində “Dinamo” Zaqrebi mübarizədən kənarlaşdıraraq artıq Avropada özünü göstərə biləcəyini sübut edib.

Bu səbəbdən “Vikinq”i “Sabah”ın asan rəqibi kimi qəbul etmək böyük səhv olar. Norveç təmsilçisi fiziki mübarizəsi, yüksək temp və sürətli keçidləri ilə “bayquşlar”ı çətinə sala bilər.

Beləliklə, “Sabah”ın Çempionlar Liqasındakı rəqiblərinin son turdakı nəticələri bir-birindən xeyli fərqlənib. “Barselona” 5:0 hesablı qələbə ilə gücünü nümayiş etdirib, “Arsenal” geridönüş edərək qalib gəlib. “Borussiya” 0:2-dən 3:2-yə dönərək xarakter göstərib. “Mançester Yunayted” isə son dəqiqələrdə qələbəni əldən verib. “Napoli” 2:0 üstünlüyünü qoruya bilməyib, “Vilyarreal” doğma meydanda məğlub olub. “Slaviya” inamlı qələbə qazanıb, “Vikinq” isə heç-heçə ilə kifayətlənib.

Bütün bunlardan çıxan əsas nəticə odur ki, “Sabah”ın qarşısında səkkiz tamamilə fərqli futbol məktəbi və səviyyəsi dayanır.“  Barselona”, “Arsenal”, “Mançester Yunayted” və “Borussiya” kimi nəhənglərə qarşı əsas məsələ rəqibin hücum gücünü neytrallaşdırmaqdırsa, “Napoli” və “Vilyarreal”la görüşlərdə xal qazanmaq üçün daha real imkanlar yarana bilər.

“Slaviya” və “Vikinq” isə ayrıca diqqət tələb edir. Bu komandalar ad baxımından nəhəng olmasalar da, hazırkı forma və oyun intizamına görə “Sabah” üçün ən təhlükəli rəqiblərdən birinə çevrilə bilərlər.

“Sabah”ın üstünlüyü isə artıq özünü təsdiqləmiş psixoloji hazırlıqdır. “Sabah” Çempionlar Liqasına təsadüfən gəlməyib – təsnifat mərhələsində ardıcıl ciddi sınaqlardan keçərək tarixində ilk dəfə bu mərhələyə yüksəlib.

İndi isə qarşıda tamam başqa səviyyəli imtahan var. Burada rəqibin adından qorxmaq yox, onun zəif tərəflərini tapmaq əsasdır. Çünki “Sabah” üçün Çempionlar Liqasının liqa mərhələsi yalnız böyük klublarla görüşlər seriyası deyil, həm də Azərbaycan futbolunun Avropadakı real səviyyəsini göstərmək üçün böyük fürsətdir.