Yüngül atletika əfsanəsi Useyn Bolt 40 yaşında gözlənilmədən yaşıl meydanlara qayıda bilər. Səkkizqat Olimpiya çempionunun adı İngiltərənin Mançester şəhərini təmsil edən “Uitenşou” (Wythenshawe) həvəskar komandasının heyətində yer alıb.

100 və 200 metr məsafələrə qaçışda dünya rekordlarını hələ də əlində saxlayan yamaykalı ulduzun adı İngiltərə Futbol Assosiasiyasının rəsmi saytında qeydiyyatdan keçib. Lakin komanda bu keçidi hələ rəsmən elan etməyib. Klub məsələ ilə bağlı təfərrüatları açıqlamadığı üçün hazırda bunun gerçək bir transfer, yoxsa marketinq gedişi olduğu bəlli deyil.

Əgər Bolt kluba qoşularsa, komandanın yeganə böyük ulduzu olmayacaq. Son illərdə “Uitenşou” sabiq futbolçuların toplaşdığı məkana çevrilib və heyətində Premyer Liqadan tanıdığımız məşhur simalar yer alıb. İndiyədək Denni Drinkuoter, Antonio Valensiya, Coleon Leskott, Emil Heski, Mark Olbrayton, Nedum Onuoxa və Papiss Sisse kimi tanınmış adlar bu klubun formasını geyiniblər.

Komandaya “Mançester Siti” və İrlandiya millisinin sabiq futbolçusu Stiven Ayrlend baş məşqçilik edir. Təkcə ötən mövsüm komandanın heyətində İngiltərə futbolunun yüksək divizionunda ümumilikdə 1800-dən çox oyun keçirmiş futbolçular çıxış edirdi.

Bolt üçün futbolla bağlılıq heç də yeni deyil. 2017-ci ildə yüngül atletika karyerasını başa vurduqdan sonra o, peşəkar futbolçu olmaq xəyalını gerçəkləşdirməyə çalışmışdı. 2018-ci ildə Avstraliyanın “Sentral Kost Mariners” komandasının düşərgəsinə yollanan əfsanəvi idmançı, “Makartur”la yoldaşlıq matçında iki qol da vurmuşdu. Lakin yekunda onun peşəkar futbol karyerası qurmaq cəhdi alınmamışdı. “Mançester Yunayted”in qatı azarkeşi kimi tanınan Bolt futbola olan sevgisini heç vaxt gizlətməyib və karyerasını bitirdikdən sonra da mütəmadi olaraq xeyriyyə matçlarında iştirak etməklə idmanın bu növünə bağlılığını nümayiş etdirir.