Bakıda qadın voleybolçular arasında Avropa çempionatının (EuroVolley) rəsmi açılış mərasimi keçirilib.

Milli Gimnastika Arenasında təşkil olunan tədbirdə azarkeşlər üçün rəngarəng şou proqramı təqdim edilib. Açılış mərasimindən sonra turnirin ilk oyununda qarşılaşacaq Azərbaycan və Portuqaliya milli komandaları meydana dəvət olunublar.

Hər iki ölkənin dövlət bayraqları arena mərkəzinə gətirildikdən sonra Azərbaycan və Portuqaliyanın dövlət himnləri səsləndirilib.

Azərbaycan və Portuqaliya arasında keçirilən açılış qarşılaşmasına azarkeş marağı da yüksək olub. Matç anşlaqla başlayıb, tribunalar tamamilə dolub.

Qadın voleybolçular arasında Avropa çempionatı avqustun 21-dən sentyabrın 6-dək dörd ölkənin – Azərbaycan, Türkiyə, İsveç və Çexiyanın birgə ev sahibliyi ilə keçirilir.

Turnirin C qrupunun oyunlarına avqustun 21-dən 28-dək ölkəmiz ev sahibliyi edəcək. Dörddəbir finala vəsiqə uğrunda mübarizə aparan qrupda Azərbaycanla yanaşı, Niderland, İspaniya, Belçika, Portuqaliya və Rumıniya milli komandaları yer alır.