Dünya Çempionatının 1/8 finalında İsveçrəyə uduzaraq mübarizəni dayandıran Kolumbiya millisinin futbolçusu Xaminton Kampos və ailəsi ciddi təzyiqlərlə üzləşib.
Qarşılaşmanın əlavə olunmuş vaxtının 115-ci dəqiqəsində 100 faizlik qol şansını boşa verən 26 yaşlı hücumçu təhdidlərin hədəfinə çevrilib. Penaltilər seriyasında İsveçrəyə uduzduqdan sonra azarkeşlərin qəzəbi pik həddə çatıb.
Kampos jurnalistlərə açıqlamasında son günlər özünün və ailəsinin təhqirlərə, hətta ölüm təhdidlərinə maruz qaldığını bildirib. Vəziyyət o həddə çatıb ki, futbolçu hələ də vətəninə qayıtmaqla bağlı qəti qərar verə bilmir.
Təcrübəli oyunçu sosial şəbəkə hesabında azarkeşlərə çağırış edərək bu sözləri yazıb:
“Ölkəmdən xahiş edirəm ki, qarşılıqlı hörməti heç vaxt unutmasınlar. Baş verənlərə fərqli bucaqlardan baxa, məyusluq və ya təəssüf hiss edə bilərik. Lakin heç bir şey nifrət və qorxu içində yaşamağa bəraət qazandıra bilməz”.