Braziliya futbolunun əfsanəsi Romario, DÇ-2026-nın 1/8 finalında “pentaçempionlar”ın Norveçə 1:2 hesablı gözlənilməz məğlubiyyətindən sonra millinin baş məşqçisi Karlo Ançelottini sərt şəkildə tənqid edib. 1990-cı ildən bəri Braziliyanın dünya çempionatlarında ən erkən uğursuzluğuna toxunan 60 yaşlı mütəxəssis, italyan çalışdırıcını dərhal istefaya çağırıb: “O, artıq Braziliya millisinidə qala bilməz, bu qətiyyən yolverilməzdir. Əgər mən Braziliya Futbol Konfederasiyasının (CBF) rəhbəri olsaydım, elə paltardəyişmə otağındaca onun müqaviləsinə xitam verərdim. Norveçlə oyun bir rüsvayçılıq idi. Əgər o, yerli məşqçi olsaydı, çoxdan qovulmuşdu. Amma əcnəbi olduğu üçün yerli media susur”.

Karlo Ançelotti turnirdə iştirak edən 48 komanda arasında illik 11,3 milyon dollar maaşla ən yüksək ödənişli baş məşqçidir. CBF mundialın startından az əvvəl onun 2025-ci ildən qüvvədə olan müqaviləsini 2030-cu ilə qədər uzatmışdı. Baş tutan uğursuzluqdan sonra sosial şəbəkələrdə paylaşım edən Ançelotti isə birlik nümayiş etdirməyə çağırıb və Braziliyanın geri dönəcəyinə söz verib.