Portuqaliya millisi üçün Dünya Çempionatı uğursuz yekunlaşdı. Komandanın 1/8 final mərhələsində İspaniyaya 0:1 hesabı ilə uduzaraq turnirlə vidalaşmasından sonra, 52 yaşlı baş məşqçi Roberto Martines istefa verdiyini rəsmən açıqlayıb.
Dünya Çempionatından əvvəl də Martinesin Portuqaliya sükanı arxasında son turnirinə çıxacağı barədə şayiələr gəzirdi. Müqavilə müddəti başa çatan mütəxəssis, matçdan sonrakı mətbuat konfransında bu qərarı təsdiqləyib: “Bu qərarı çempionatdan əvvəl qəbul etməmişdim. Mən Portuqaliyaya Dünya Çempionatını qazanmaq üçün gəlmişdim və buna nail ola bilmədiyimiz üçün fəaliyyətimi davam etdirməyin mənası yoxdur. İndi federasiya rəhbərliyinin və prezidentin yeni baş məşqçi seçmək imkanı var. Prezident işimi hər zaman dəstəkləsə də, müqaviləm bu gün başa çatır. Artıq deyiləcək xüsusi bir söz yoxdur”.
Martines 2023-cü ildə millinin sükanı arxasına keçsə də, onun Portuqaliya karyerası o qədər də parlaq alınmadı. Komanda 2025-ci ildə Millətlər Liqasının qalibi olsa da, böyük turnirlərdə ümidləri doğultmadı: Avro-2024-də dörddəbir finalda, builki mundialda isə elə 1/8 finalda mübarizəni dayandırdı.
A Bola nəşrinin yaydığı məlumata görə, millinin yeni baş məşqçisi 71 yaşlı Xorxe Xesus olacaq. Təcrübəli mütəxəssisin son iş yeri Kriştiano Ronaldonun da formasını geyindiyi Səudiyyə Ərəbistanının “Əl-Nəsr” klubu olub.