Mundialda çıxış edən Kot d’İvuar millisinin və “Nitsa”nın hücumçusu Eli Vahi danışılmış oyunlar və qeyri-qanuni mərc qalmaqalı ilə gündəmə gəlib. 23 yaşlı futbolçunun turnir start ərəfəsində polis tərəfindən saxlanıldığı məlum olub.

The Athletic nəşrinin məlumatına görə, fransız polisi Vahini mayın 29-da saxlayıb. Araşdırmanın mərkəzində isə futbolçunun mayın 17-də Fransa Liqa 1-də “Mets”lə oyunda aldığı sarı vərəqə dayanır. Araşdırmalara görə, oyunun gedişində Vahinin Sadibu Saneyə qarşı etdiyi kobudluğa və məhz həmin an alacağı sarı vərəqəyə anomal dərəcədə yüksək məbləğdə mərclər edilib.

Prokurorluq Kot d’İvuar millisinin ulduz hücumçusunun saxlanılması faktını təsdiqləyib. İstintaq çərçivəsində futbolçuya qarşı mütəşəkkil dələduzluq, idmanda korrupsiya, həmçinin cinayət yolu ilə əldə edilmiş gəlirlərin mənimsənilməsi və çirkli pulların yuyulması kimi ağır maddələr üzrə şübhələr irəli sürülüb. Vahi dindirildikdən sonra rəsmi ittiham olunmadan sərbəst buraxılsa da, hüquq-mühafizə orqanları tərəfindən araşdırmalar davam etdirilir.

Bu gizli araşdırmadan xəbərsiz olan Kot d’İvuar millisi iyunun 15-də Ekvadora qarşı keçirdiyi ilk matçda Vahiyə şans verib. Meydanda 56 dəqiqə qalan və bir zərbəsi dirəkdən qayıdan hücumçunun həbsi barədə rəsmi açıqlama verilməmişdi.

The Athletic məsələ ilə bağlı FİFA, Kot d’İvuar Futbol Federasiyası və futbolçunun özünə sorğu göndərib. FİFA oyunçunun həbsindən mundial öncəsi xəbərdar olub-olmaması ilə bağlı sualları cavablandırmaqdan imtina edib.