Premyer Liqanın 32-ci turunda səfərdə “Şamaxı”ya 2:3 hesabı ilə uduzan “Turan-Tovuz”un baş məşqçisi Kurban Berdiyev qarşılaşmadan sonra mətbuat konfransında iddialı və maraqlı açıqlamalarla yadda qalıb.

Təcrübəli mütəxəssis komandasının zəif oyunundan, avrokubok təminatının komandaya psixoloji təsirindən bəhs edib və referilərin idarəçiliyinə üstüörtülü mesaj göndərib.

Matçın ilk yarısındakı sönük oyunu etiraf edən Berdiyev, hakimlikdən narazı qaldığını gizlətməyib: “İlk hissədə çox pis oynadıq. Amma xahiş edirəm, mənə hakimlə bağlı sual verməyin, bu barədə danışmayacam. İkinci hissədə isə daha aqressiv futbol sərgilədik, hesabı bərabərləşdirməyi də bacardıq. Təəssüf ki, ardınca yenidən qapımızda qol gördük”.

“Turan-Tovuz”un artıq avrokuboklara vəsiqəni təmin etməsinin futbolçularda arxayınlıq yaradıb-yaratmadığı sualına baş məşqçinin cavabı belə olub: “Müəyyən mənada bəli, təsir etdi. Çünki ilk hissədə ciddi diqqətsizliklər var idi. Lakin ikinci yarıdakı oyuna görə futbolçularıma təşəkkür etdim, çünki matçın axarını dəyişə bildik. Sonda o qolu buraxmasaydıq, hər şey daha yaxşı olardı. İlk hissədəki bəzi səhvlərlə barışmaq olar, amma rəqib də çox aqressiv oynayırdı. İkinci topların qazanılmasında gecikirdik. Fasilədən sonra bu çatışmazlıqları aradan qaldıra bildik”.

Hər iki komandanın aşırı aqressiv mübarizə aparmasına toxunan Kurban Berdiyev, bunun birbaşa ədalət təmsilçilərinin qərarları ilə bağlı olduğunu vurğulayıb: “Meydandakı o aqressivlik və gərginlik sırf hakimliyə görə baş verirdi”.

Gələn mövsüm ölkəmizi Avropada təmsil edəcək Qərb klubunun transfer planları barədə danışan Berdiyev, axtarışların davam etdiyini bildirib: “Yeni oyunçuların axtarışı hazırda da davam edir, hələ ki, yekun nəticə yoxdur. Rəhbərliklə transfer sayını müzakirə etmişik. Hər şey tapacağımız keyfiyyətli futbolçuların sayından asılı olacaq”.