Gürcüstanın paytaxtı Tbilisidə keçirilən cüdo üzrə Avropa çempionatında gözlənilməz hadisə yaşanıb. $100$ kq çəki dərəcəsində mübarizə aparan Olimpiya çempionumuz Zelim Kotsoyev bürünc medal uğrunda həlledici görüşə buraxılmayıb.

Buna səbəb idmançımızın niderlandlı Simeon Katarina ilə qarşılaşdığı yarımfinal döyüşündə qaydaları pozması olub. Kotsoyev icazə verilməyən fənd tətbiq etdiyi üçün hakim tərəfindən birbaşa “hansoku-make” (diskvalifikasiya) qərarı ilə cəzalandırılıb. Beynəlxalq qaydalara əsasən, bu cür cəza alan idmançı təsəlliverici medal görüşlərindən kənarlaşdırılır.

Yarışın son günündə xalçaya çıxan digər təmsilçilərimiz — Mədina Xaisinova (+78 kq) və Kənan Nəsibov (+100 kq) rəqiblərinə müqavimət göstərə bilməyərək turniri mükafatsız başa vurublar.

Xatırladaq ki, daha əvvəl Hidayət Heydərov (73 kq) gümüş, Əhməd Yusifov (60 kq), Turan Bayramov (66 kq) və Zelim Tçkayev (81 kq) bürünc medala sahib çıxıblar. Turnirə bu gün yekun vurulacaq.