Şimali Amerikanın üç ölkəsinin ev sahibliyi edəcəyi DÇ-2026-nın startı yaxınlaşdıqca, turnirin oyunlarına olan maraqla yanaşı, biletlərin qiyməti də rekord sürətlə artmaqda davam edir.

ESPN-in yaydığı məlumata görə, Nyu-Cersidəki məşhur “MetLife” stadionunda keçiriləcək final matçı üçün biletlərin qiymətində növbəti kəskin artım müşahidə olunub. Hazırda həlledici qarşılaşmanı canlı izləmək istəyənlər üçün qiymətlər aşağıdakı kimidir:

VİP (ən bahalı) biletlər. Əvvəlki 8 680 dollar qiyməti artıq tarixə qovuşub. İndi bu kateqoriyadan olan yerlər üçün 10 990 dollar ödəmək lazımdır.

2-ci kateqoriya. Qiymətlər 5 575 dollardan 7 380 dollara yüksəlib.

3-cü kateqoriya. Əvvəllər 4 185 dollara təklif olunan bu biletlər indi 5 785 dollara satılır.

Qiymətlərin bu dərəcədə yüksəlməsinin əsas səbəbi FIFA-nın tətbiq etdiyi dinamik qiymət siyasətidir. Tələb artdıqca süni intellekt və bazar alqoritmləri qiymətləri avtomatik yuxarı qaldırır. Xatırladaq ki, turnir ABŞ-ın 11, Meksikanın 3 və Kanadanın 2 şəhərində baş tutacaq.

Bilet bazarındakı vəziyyət yalnız qiymətlərlə bitmir. FIFA-nın öz rəsmi təkrar satış platformasında həm alıcıdan, həm də satıcıdan 15% komissiya tutması azarkeş qruplarının ciddi etirazına səbəb olub. Artıq bir azarkeş birliyi məsələ ilə bağlı keçən ay Avropa Komissiyasına rəsmi şikayət ünvanlayıb.Xatırladaq ki, DÇ-2026 gələn ilin 11 iyun – 19 iyul aralığında keçiriləcək. Bu, tarixdə 48 komandanın iştirak edəcəyi ilk dünya birinciliyi olacaq.