“La Gazzetta dello Sport” nəşrinin məlumatına görə, elektrikli əlil arabasındakı 81 yaşlı kişini maşınıyla vuraraq öldürən “İnter”ın qapıçısı Xosep Martines sürət həddini aşmayıb, qanında spirtli içki və narkotik maddə aşkarlanmayıb.
Qəzet qəzanın baş verdiyi yol hissəsi təhlükəli ərazi hesab olunduğunu yazıb. Magistralın həmin hissəsində çoxsaylı , o cümlədən ciddi qəzaların baş verdiyi yer olduğunu bildirir. Bu hissədə sürət həddi saatda 70 km-dir və Martinesdə qoylan həddi aşmayıb.
Futbolçu əvvəlcə alkoqol və narkotik testləri üçün Saronnodakı xəstəxanaya aparılıb və hər iki testin nəticəsi mənfi olub. Daha sonra o, klub tərəfindən təmin edilən vəkilin iştirakı ilə Lomazzo polis bölməsində bir neçə saat ifadə verib. Hesabatda arxasındakı avtomobildə oturan iki qadının ifadələri də yer alıb və onlar Martinesin dediklərini təsdiqləyiblər.
Hadisə ilə bağlı istintaq bir neçə ay davam edəcək və bu müddət ərzində qapıçı yol qəzası nəticəsində adam öldürmə ittihamı ilə mühakimə olunacaq. Bu ittihamda iki ildən yeddi ilə qədər həbs cəzası nəzərdə tutulur. Lakin zərərçəkmişin gözlənilməz davranışı sübut olunarsa, iş ləğv ediləcək.
Xatırladaq ki, “İnter”in qapıçısının iştirakı ilə baş verən qəza 28 oktyabr çərşənbə axşamı səhəri Komo əyalətində baş verib. İlkin məlumatlara görə, yaşlı kişi özünü pis hiss edib və Martinesin avtomobilinin hərəkət etdiyi yola çıxıb. Futbolçu dərhal yaralı kişiyə kömək etməyə çalışıb.
