Bolqarıstanın ÇSKA klubunun baş məşqçisi Xristo Yanev Avropa Liqasında “Qarabağ”ı penaltilər seriyasında (5:4, əsas və əlavə vaxt – 0:0) məğlub edərək mərhələ adladıqları oyundan sonra mətbuat konfransında çıxış edib. Mütəxəssis komandasının taktiki intizamını yüksək qiymətləndirib və Ağdam təmsilçisinin gücünü xüsusi vurğulayıb.

Xristo Yanev “Qarabağ”ı üstələməyin böyük uğur olduğunu bildirib: “Məsələ yalnız motivasiyada deyil, bütün komandanın taktiki baxımdan savadlı oyunundadır. Məşqçilər korpusumu təbrik edirəm. Rəqibi analiz etmək, ən doğru taktikanı seçmək və iki matçın yekununda onları turnirdən kənarlaşdırmaq üçün böyük əmək sərf etdik. Bolqarıstanda necə nəhəng bir klubu mübarizədən kənarlaşdırdığımızı tam anlayırlarmı, bilmirəm. Müqayisə üçün deyim: qarşı tərəfdə 17 illik təcrübəsi olan baş məşqçi əyləşmişdi, “Qarabağ” isə ötən mövsüm “Benfika” və “Çelsi”yə (heç-heçə edib – red.) qalib gəlmiş komandadır”.

Baş məşqçi matçdan sonra ÇSKA-dakı fəaliyyəti və gələcək hədəfləri barədə də danışıb. O bildirib ki, bir qələbə ilə bütün tənqidlərə son qoymağın mümkün olmadığını anlayır: “Bir oyunla tənqidçilərin fikrini dəyişmək olmaz. Mən bu kluba aydın məqsədlərlə gəlmişəm. Komandamız inkişaf etməli, kuboklar qazanmalı, azarkeşləri sevindirməli və bizə hər cür şərait yaradan klub rəhbərliyinə ÇSKA-nın uğuru üçün çalışdığımızı göstərməliyik”.

Mütəxəssis komandasının Avropa Liqasının əsas mərhələsinə yüksəlmək potensialına da inandığını vurğulayıb: “Bu gün çox keyfiyyətli komanda olduğumuzu sübut etdik. Əgər bəxt də bizim tərəfimizdə olsa və bu cür məzmunlu futbol nümayiş etdirməyə davam etsək, niyə də Avropa Liqasının əsas mərhələsinə vəsiqə qazanmayaq?”