“Barselona”nın ÇL-dəki son oyunundan bir ay keçməsinə baxmayaraq, UEFA-nın İntizam Komitəsi “Atletiko” ilə baş tutan gərgin qarşılaşmanı yenidən araşdırıb. Aparılan təhlillər nəticəsində Kataloniya təmsilçisinə qarşı iki fərqli bənd üzrə maliyyə sanksiyası tətbiq edilib.

İki İspaniya nəhəngi arasındakı dörddəbir final qarşılaşması kifayət qədər dramatik hadisələrlə yadda qalmışdı. “Atletiko”nun 2:0 hesablı qələbəsi ilə başa çatan oyundan sonra “Barselona” tərəfi həm rəqib qapıçının davranışlarından, həm də baş hakim və VAR otağının qərarlarından narazılığını ifadə etmişdi.

Lakin UEFA klubun apellyasiya şikayətini rədd edərək yekun qərarını açıqlayıb: “Barselona” ümumilikdə 25 000 avro məbləğində cərimə olunub. Maliyyə sanksiyası iki əsas qayda pozuntusuna görə tətbiq edilib. Birinci səbəb oyunun bərpasının ləngidilməsidir. Hansi Flikin yetirmələri fasilədən sonra meydana gecikərək “Metropolitano” stadionunda baş hakimi gözləməyə məcbur etdikləri üçün klub 22 500 avro ziyana düşüb. Cərimənin qalan 2 500 avroluq hissəsi isə azarkeş intizamsızlığı ilə bağlıdır. Belə ki, kataloniyalı tərəfdarların Madriddəki matç zamanı pirotexniki vasitələrdən istifadə etməsi UEFA tərəfindən təhlükəsizlik qaydalarının ciddi pozuntusu kimi sənədləşdirilib.

Xatırladaq ki, “Barselona” öz meydanında 2:1 hesablı qələbə qazansa da, Madriddəki məğlubiyyət və əlavə vaxtdakı uğursuz cəhdlər komandanın turnirlə vidalaşmasına səbəb olub. “Atletiko Madrid” isə bu gərgin mübarizədən qalib ayrılaraq yarımfinala vəsiqəni təmin edib.