“Barselona” öz kubok muzeyini 2026-cı il İspaniya Superkuboku ilə zənginləşdirdi, lakin bu titul kataloniyalılar üçün yeganə mükafat olmadı. Finaldakı zəfər kluba həm də əhəmiyyətli maliyyə vəsaiti qazandırdı.

“Marca”nın məlumatına görə, “Barselona” turnirdəki qələbə üçün 2 milyon avro mükafat alıb. Finalda məğlub olan “Real Madrid” də mükafatsız qalmayıb – paytaxt klubu finalist kimi təxminən 1,5 milyon avro qazanıb. Bundan əlavə, hər iki nəhəng klub yalnız turnirdə iştirak etdikləri üçün 6 milyon avro məbləğində sabit ödəniş əldə ediblər. Beləliklə, “Barselona”nın turnirdən əldə etdiyi ümumi gəlir təxminən 8 milyon avro, “Real”ın gəliri isə təxminən 7,5 milyon avro təşkil edib.

Turnirin digər iştirakçıları olan “Atletiko” və “Atletik” (Bilbao) yarımfinalda uduzduqları üçün hər biri təxminən 3 milyon avro (iştirak və təzminat daxil olmaqla) qazanıblar. Bütün bu vəsaitlər turnirin Səudiyyə Ərəbistanında keçirilməsinə dair müqavilə çərçivəsində ödənilir. Müqaviləyə əsasən, Kral İspaniya Futbol Federasiyası ümumilikdə 51 milyon avro alır ki, bunun da 26 milyonu ölkə futbolunun inkişafına sərf edilir.