Braziliyalı hücumçu Aleks Souza “Turan Tovuz”la rəsmən vidalaşıb. 23 yaşlı forvard ayrılığı barədə öz “Instagram” hesabında emosional paylaşım edib:
“Karyeramın mühüm bir mərhələsi başa çatdı. Bu müddət ərzində yaşadıqlarıma, mənə yaradılan şəraitə və göstərilən etimada görə ‘Turan Tovuz’ camiəsinə dərindən minnətdaram. İdarə Heyətinə, məşqçilər heyətinə, komanda yoldaşlarıma və hər zaman bizə dəstək olan möhtəşəm azarkeşlərimizə təşəkkür edirəm. Buradan özümlə dəyərli təcrübə, peşəkar inkişaf və ömür boyu yaddaşımda qalacaq xatirələr aparıram.”
Xatırladaq ki, Aleks Souza karyerasını Yaponiyanın “Kioto Sanqa” klubunda davam etdirəcək. Futbolçu cari mövsümdə “Turan Tovuz”un heyətində sərgilədiyi məhsuldar oyunla diqqəti cəlb etmişdi. Onun Yaponiyaya transferi Tovuz təmsilçisi üçün həm də uğurlu bir transfer satışı kimi qiymətləndirilir.