Premyer Liqanın lideri “Sabah”ın zədəli futbolçuları ilə bağlı son durum açıqlanıb. Paytaxt təmsilçisinin hücum xəttindəki iki vacib itkisi – Pavol Şafranko və Coy-Lens Mikkelsin geri dönüş vaxtı dəqiqləşib.
Ötən ilin noyabrında cərrahi masaya yatan Pavol Şafrankonun bərpa prosesi plan üzrə gedir. “İkinci mərtəbə”dəki üstünlüyü və cərimə meydançasındakı effektivliyi ilə seçilən 30 yaşlı slovakiyalı forvardın mart ayında ümumi qrupa qoşulması gözlənilir. Onun uzunmüddətli yoxluğu hücum rotasiyasını məhdudlaşdırsa da, məhz çempionatın həlledici mərhələsində sıraya dönməsi komanda üçün əlavə güc olacaq.
Almaniyalı vinger Coy-Lens Mikkelsin vəziyyəti isə daha ümidvericidir. Hazırda fərdi proqramla məşq edən futbolçunun gələn həftədən komanda ilə hazırlıqlara başlayacağı bildirilir. Cinah hücumlarında rəqib müdafiəsini yarmaq bacarığı ilə seçilən Mikkelsin tezliklə, oyun praktikası qazanmaq məqsədilə qarşıdakı turlarda meydana çıxması gözlənilir.