Qətərin paytaxtı Doha şəhəri şahmatın rapid və blits növləri üzrə dünya çempionatına ev sahibliyi etməyə davam edir. Ümumi mükafat fondu 1 milyon ABŞ dolları təşkil edən bu mötəbər turnirdə ölkəmizi 17 şahmatçı ilə təmsil edir.

Rapid yarışlarının növbəti günündə kişilər arasında 4 tur gerçəkləşib. Gərgin keçən 9 turun yekununa əsasən, təmsilçilərimiz arasında ən yüksək nəticəni ölkənin bir nömrəli şahmatçısı Şəhriyar Məmmədyarov göstərib. Hesabına 6,5 xal yazdıran qrosmeysterimiz, dünya elitası ilə kəskin rəqabət şəraitində turnir cədvəlinin 10-cu pilləsinə yüksəlməyi bacarıb. Digər təmsilçilərimiz də mövqelərini yaxşılaşdırmaq üçün növbəti turlarda mübarizəyə qoşulacaqlar.

Qadın şahmatçıların mübarizəsində isə gün ərzində 5 tur oynanılıb. 8 turun nəticələrinə görə, qadın millimizin lideri Günay Məmmədzadə 5,5 xal toplayaraq 21-ci sırada qərarlaşıb. Qeyd edək ki, liderlərlə xal fərqinin az olması Məmmədzadəyə növbəti turlarda daha üst sıralara yüksəlmək şansı verir.

Dünya çempionatına dekabrın 30-da yekun vurulacaq. Yarışın proqramına uyğun olaraq, şahmatçılarımız rapid turnirindən dərhal sonra daha dinamik və sürətli olan blits üzrə dünya çempionu titulu uğrunda mübarizəyə qoşulacaqlar. Azarkeşlər təmsilçilərimizdən hər iki növdə medal gözləyirlər.