Serbiyanın Zrenjanin şəhərində keçirilən 23 yaşadək güləşçilərin Avropa çempionatı yığmamız üçün uğurlu davam edir. Çempionatın ikinci günündə xalçaya çıxan sərbəst güləşçilərimiz 2 gümüş və 3 bürünc medala qazanıblar.
Günün həlledici qarşılaşmalarında Vasif Bağırov (57 kq) və Səbuhi Əmiraslanov (79 kq) rəqiblərinə məğlub olaraq gümüş medalla kifayətləniblər.
Bürünc medal uğrunda mübarizədə isə idmançılarımız maksimum nəticə göstəriblər:
Musa Ağayev (65 kq), Zəfər Əliyev (97 kq) və təsəlli qrupundan uğurla keçən Ramik Heybətov (70 kq) fəxri kürsünün üçüncü pilləsinə qalxıblar.
Yarışın gündüz proqramında mübarizəyə qoşulan digər beş güləşçimizdən üçü adını finala yazdıraraq çempionluq şansını qoruyub. Ceyhun Allahverdiyev (61 kq), Əli Çokayev (92 kq) və Yusif Dursunov (125 kq) rəqiblərini məğlub edərək həlledici mərhələyə yüksəliblər.
Digər təmsilçilərimiz Ağanəzər Novruzov (74 kq) və Vasif Xudiyev (86 kq) isə sabah bürünc medal uğrunda mübarizə aparacaqlar.