Səfərdə “Qəbələ”ni 1:0 hesabı ilə məğlub edən “Zirə”nin çalışdırıcısı Rəşad Sadıqov oyunsonrası mətbuat konfransında qələbə sevincini bölüşüb, komandanın vəziyyəti və gələcək planlarına toxunub.

Qarşılaşmanın gərgin keçdiyini vurğulayan Sadıqov rəqibin oyununu xüsusi qeyd edib: “Bizim üçün kifayət qədər ağır oyun oldu. “Qəbələ” çox baxımlı futbol sərgiləyir. Hesab edirəm ki, bu heyətlə onlar turnir cədvəlində daha yüksək yerlərdə qərarlaşmalı və avrokuboklar uğrunda mübarizə aparmalı idilər. Matç gərgin mübarizə şəraitində keçdi. Sona qədər fədakar oyun nümayiş etdirdikləri üçün futbolçularıma təşəkkür edirəm”.

Zirəlilərin oyunun əvvəlindəki zəif çıxışına aydınlıq gətirən baş məşqçi, əsas səbəbin yorğunluq olduğunu bildirib: “Oyuna çox pis başladıq, birinci hissədə top itkilərimiz həddindən artıq çox idi. Aprel ayının sıx oyun qrafiki və fiziki yorğunluq artıq özünü büruzə verir. İkinci hissədə müəyyən qədər toparlana bildik və oyunu xeyrimizə dəyişdik. Növbəti görüşlərdə daha keyfiyyətli futbol oynamaq üçün daxili güc tapmalıyıq”.

Heyətdəki itkilərin taktiki gedişlərə mane olduğunu deyən mütəxəssis, bəzi futbolçuları riskə atdıqlarını gizlətməyib: “Müəyyən mövqelərdə rotasiyalar etdik, lakin hələ də ciddi problemlərimiz var. Xüsusilə Enrikenin zədəsi bizi çətin vəziyyətdə qoyub. Bu səbəbdən İssa Cibrillanı rotasiya edə bilmirik. İssa ardıcıl ağır oyunlardan sonra zədələnmə riskinin olduğunu özü də bilir. Bu gün onu meydana bir az ehtiyatla buraxmışdıq, elə qoldan dərhal sonra da zədələnməməsi üçün əvəzlədik”.