Oyun sanki “Qarabağ”ın ötən turdakı “Araz-Naxçıvan”la matçın senarisini təkrarladı. Rəqib ilk yarıda azlıqda qalmaqla ağdamlılara qarşı mübarizədə çətin duruma düşdü. Naxçıvan klubundan fərqli olaraq “Qəbələ” daha tez, artıq 3-cü dəqiqədə Ovusunun meydandan qovulması ilə azlıqda qaldı. Oyun baxımdan da “Qəbələ” “Araz-Naxçıvan”dan fərqlənirdi. Kaxaber Tsxdadzenin yetirmələri 10 nəfər qalmasına rəğmən “Araz-Naxçıvan” kimi aciz və məhkum görünmürdü. Hətta ilk yarının sonlarında Massumo hesabı bərabərləşdirə də bilərdi. Bununla belə “Qarabağ” fasiləyə minimal üstünlüklə yollandı.
İkinci hissə meydan sahiblərinin üstünlüyü ilə keçdi. Lakin qonaqlar müdafiədə ağıllı, mütəşəkkil müdafiə ilə qapısını bağlı saxlaya bildi. Yalnız uzatma dəqiqələrində “Qarabağ” ikinci qolu vurdu. Məğlubiyyətə baxmayaraq “Qəbələ” yaxşı təsir bağışladı. Rəqib əsas heyətlə oynasa da, “ağ-qaralar” “Araz-Naxçıvan”dan fərqli olaraq daha layiqli müqavimət göstərdilər.
Premyer Liqa, 6-cı tur
“Qarabağ” – “Qəbələ” 2:0
“Qarabağ”: M.Koxalski, L.Andrade, K.Medina, B.Mustafazadə, E.Cəfərquliyev, A.Zubir, M.Silva, E.Addai, K.Borqes, P.Bikalyo, K.Duran.
“Qəbələ”: S.Ağayev, N.Əliyev, S.Damadayev, D.Massumo, Ş.Şahniyarov, E.Əhmədov, A.Ba Loua, E.Kunde, P.Ovusu, İ.Amoah, X.Syerra.
Qol: Zubir, 16. Qurbanlı, 90+3.