“Mançester Siti”nin baş məşqçisi Pep Qvardiola Çempionlar Liqasının son turunda yaşanan dramatik anlarla bağlı maraqlı etiraflar edib. Təcrübəli mütəxəssis “Benfika”nın “Real” üzərindəki 4:2 hesablı qələbəsini paltardəyişmə otağında futbolçuları ilə birlikdə necə həyəcanla izlədiyindən danışıb.

İspaniyalı çalışdırıcı bildirib ki, həmin anlarda nə o, nə də oyunçuları “Benfika”nın pley-offa yüksəlməsi üçün mütləq dördüncü qolu vurmalı olduğundan xəbərsiz olublar:

“Biz oyundan yeni çıxmışdıq, ona görə də ‘Benfika’nın mütləq qol vurmalı olduğunu bilmirdik. Qapıçı Anatoli Trubinin rəqib cərimə meydançasına yollandığını görəndə hamımız təəccübləndik. “Ora niyə gedirsən?” deyə soruşduq. Çünki “Real” əks-hücumda hesabı bərabərləşdirsəydi, biz də vəziyyətimizi çətinə salardıq. Amma sən demə, onlara dördüncü qol lazım imiş,” – deyə ESPN Qvardioladan sitat gətirib.

Qeyd edək ki, ümumi mərhələnin son turunda “Qalatasaray”ı 2:0 hesabı ilə məğlub edən “Mançester Siti” turnir cədvəlini 8-ci pillədə başa vurub. Bu nəticə sayəsində “şəhərlilər” əlavə pley-off oyunlarından yayınaraq birbaşa Çempionlar Liqasının 1/8 finalına vəsiqə qazanıblar.