«Zirə»nin kapitanı Qismət Alıyev Premyer Liqanın yeni mövsümünün startı öncəsi ölkə mediasına komandasının hazırlıq prosesi və ilk turdakı rəqibi haqqında fikirlərini bölüşüb. Təcrübəli futbolçu avrokubok matçlarından sonra diqqəti tam olaraq ölkə çempionatına yönəltdiklərini bildirib: “Mövsümə tez başladıq və artıq 4 rəsmi oyun keçirmişik. Avrokuboklardakı çıxışın komandaya necə təsir göstərəcəyini indidən demək çətindir. Hazırlıq işlərimiz plan üzrə davam edir: intensiv məşqlər keçirik və əsas məqsədimiz Premyer Liqanın 1-ci turuna tam hazır vəziyyətdə çıxmaqdır”.

Alıyev ilk turdakı rəqibləri elitanın debütantı «Şəfa»nı təbrik edərək, açılış matçının gərgin keçəcəyini vurğulayıb: “Yeni mövsümün başlamasına on gün qalıb. Konfrans Liqasındakı uğursuzluqdan sonra diqqətimizi tam şəkildə daxili çempionata cəmləmişik. Komanda böyük həvəslə çalışır və hər bir futbolçu açılış matçına optimal formada yanaşmaq üçün əlindən gələni edir.

İlk növbədə, «Şəfa»nı Premyer Liqaya yüksəlməsi münasibətilə təbrik edir, onlara uğurlar arzulayıram. Mövsümün ilk turunda məhz bu komanda ilə qarşılaşacağıq. Rəqib güclü heyət formalaşdırmağa çalışıb və təcrübəli legionerlər transfer edib. İlk turun oyunları hər iki tərəf üçün həmişə çətin olur. Buna baxmayaraq, biz çempionata qələbə ilə başlamaq niyyətindəyik. Əminəm ki, azarkeşləri maraqlı və gərgin mübarizə gözləyir”.