Ölkə çempionu “Qarabağ” sol cinah müdafiəsini gücləndirmək üçün hərəkətə keçib. Kiprin AEK (Larnaka) klubunun fransalı müdafiəçisi Jeremi Njali artıq Bakıya gəlib. Ağdam təmsilçisinin yeni transfer hədəfi olan 23 yaşlı futbolçu bu gün paytaxtımızda geniş tibbi müayinədən keçəcək. Əgər səhhətində hər hansı bir problem aşkarlanmazsa, tərəflər arasında rəsmi müqavilə imzalanacaq. “Qarabağ”ın bu transferlə müdafiənin sol cinahında rəqabəti artırmağı planlaşdırdığı bildirilir. Karyerasına Fransanın köklü klublarından olan “Metz”in ikinci komandasında başlayıb və burada fundamental futbol təhsili alıb. Daha sonra İspaniyaya yollanaraq “Tarasona” və “Melilya” klublarının formasını geyinib. İspaniya futbolunun taktiki nizam-intizamına bələddir. Son olaraq Kiprin iddialı klublarından olan AEK-ə transfer olunub. Onun Kipr təmsilçisi ilə hazırkı müqaviləsi bu ilin mayın 31-nə qədər qüvvədədir.

Sol cinah müdafiəçisi mövqeyində çıxış edən Njali, sürəti və fiziki dözümlülüyü ilə seçilir. Elvin Cəfərquliyevin yükünü azaltmaq və rotasiya imkanlarını genişləndirmək baxımından bu transfer Qurban Qurbanov üçün əhəmiyyətli gəlişmədir. Xüsusilə gənc olması, onun gələcəkdə daha baha qiymətə satılma potensialını da gündəmə gətirir.