Polşanın Katovitse şəhərində şahmat üzrə fərdi Avropa çempionatı həlledici mərhələyə qədəm qoyur. Dünya Kubokuna vəsiqə qazanmaq uğrunda mübarizə aparan zəka sahiblərimiz növbəti turda uğurlu nəticələrlə yadda qalıblar.

Turnirin doqquzuncu turu Azərbaycan təmsilçiləri üçün ümumilikdə məhsuldar keçib. Təmsilçilərimizdən Nicat Abasov, Məhəmməd Muradlı, Elşad Babazadə, çingiz Aslanov və qadın şahmatçımız Gövhər Beydullayeva rəqiblərini məğlub edərək aktivlərinə növbəti xalları yazdırıblar. Aydın Süleymanlı, Vüqar Manafov, İsmayıl Vəliyev, Abdulla Talıbov, Read Səmədov və Daniz Zuqanov turu heç-heçə ilə başa vurublar. Turun maraqlı qarşılaşmalarından biri iki həmyerlimiz arasında baş tutub. Əhməd Əhmədzadə Sənan Süleymanlı ilə görüşdən qalib ayrılmağı bacarıb.

Doqquz turdan sonra Azərbaycan şahmatçıları arasında ən yüksək göstərici Nicat Abasova məxsusdur. Aktivində 7,5 xal olan Abasov hazırda turnir cədvəlinin təkbaşına lideridir. Digər ümidverici nəticə isə 7 xalla 4-cü pillədə qərarlaşan Aydın Süleymanlıya məxsusdur. Hər iki şahmatçımız qitə birinciliyinin medalları və Dünya Kubokuna vəsiqə üçün real şanslarını qoruyurlar.

Ümumilikdə 11 turdan ibarət olan Avropa çempionatı aprelin 19-da yekunlaşacaq.