Bu günlərdə “Santos”un forvardı Neymarın zədələndiyi və ilin sonunadək yaşıl meydandan uzaq düşəcəyi barədə məlumat yayılıb. Hücumçunun atası Braziliya mətbuatında dərc olunan xəbərlə bağli TNT Sports-un sualını belə cavablandırıb: “Onun zədəsi barədə heç nə bilmirik. Neymar tibbi müayinədən keçib və biz hələ nəticəni gözləyirik. Bu, absurddur, biz belə xəbərlərə diqqət yetirmirik. Ortada nəticə yoxdursa, suallara necə cavab verə bilərəm? Deyəsən, siz məndən daha çox şey bilirsiniz. Bildiyim tək şey odur ki, o, narahatlıq hiss etdiyi üçün müayinə olunub. Müayinə keçirilib və hələlik ortada heç bir məlumatım yoxdur. Nədənsə mətbuat məni və oğlumu qabaqlayır”.
Xatırladaq ki, Neymar bu mövsüm Braziliya çempionatında 17 oyun keçirib və 4 qol vurub. Onun klubla müqaviləsi ilin sonunda bitir.
