Portuqaliya və İspaniya mətbuatının məlumatına görə, Joze Mourinyo “Real”ın yeni baş məşqçisi təyin edilib. Alvaro Arbeloanı əvəzləyən portuqaliyalı mütəxəssis bu gün axşam Madridə gələrək, çərşənbə günü səhər Valdebebasda ilk məşqinə çıxacaq. Komandanın məşqçilər korpusuna sabiq müdafiəçi Pepenin də daxil olacağı gözlənilir.

Mourinyonun “Real”a dönüşü bir neçə həftədir müzakirə olunsa da, rəsmiləşməsi bazar günü keçirilən prezident seçkilərində Florentino Peresin qələbəsindən asılı idi. Madridlilər bu transfer üçün “Benfika”ya 15 milyon avro təzminat ödəyəcək. Xatırladaq ki, 2025-ci ilin sentyabrından Lissabon təmsilçisini çalışdıran Mourinyo bu mövsüm klubla heç bir titul qazana bilməyib.

Mütəxəssislər Mourinyonun gəlişi ətrafındakı mətbuat hay-küyünü “sabun operası” adlandıraraq, onun “Real”dakı perspektivlərinə ehtiyatla yanaşırlar. Analitiklər həm Mourinyonun, həm də ötən mövsüm La Liqada “Barselona”dan geri qalan “Real”ın mövsümü əliboş başa vurmasını xatırladaraq, komanda üçün gözləntilərin şişirdildiyini vurğulayırlar.

Xatırladaq ki, Joze Mourinyo “Real”a yad sima deyil. 2010-2013-cü illərdə də “Kral klubu”nu çalışdıran portuqaliyalı mütəxəssis həmin dönəmdə İspaniya çempionluğu, Kral Kuboku və Superkuboku qazanmağa müvəffəq olmuşdu.