Bakıda keçiriləcək Avropa çempionatına hazırlaşan qadın voleybolçulardan ibarət millimia təlim-məşq toplanışı çərçivəsində Latviya yığması ilə iki yoxlama oyunu keçirib.
Azərbaycan Voleybol Federasiyasından (AVF) verilən məlumata görə, hər iki qarşılaşma təmsilçilərimizin qələbəsi ilə başa çatıb. Voleybolçularımız gərgin keçən ilk matçda rəqibini 3:2, ikinci görüşdə isə inamlı oyunu ilə 3:0 hesabı ilə məğlub edib.
Xatırladaq ki, qadın voleybolçular arasında Avropa çempionatının oyunları 21-28 avqust tarixlərində Bakıda təşkil olunacaq. Doğma azarkeşlər önündə çıxış edəcək yığmamız C qrupunda mübarizə aparacaq.
Növbəti mərhələyə vəsiqə qazanmaq uğrunda millimizin rəqibləri Portuqaliya, Niderland, Belçika, Rumıniya və İspaniya komandaları olacaq.