Yaponiya futbolunun əfsanəvi siması Keysuke Honda, növbəti dəfə təkcə meydandakı oyunu ilə deyil, həm də xarakteri və sarsılmaz prinsipləri ilə dünya mətbuatının diqqət mərkəzinə düşüb. 39 yaşlı keçmiş futbolçu, siyasi konyunkturanı idman ruhundan üstün tutan böyük bir ABŞ şirkəti ilə çoxmilyonluq reklam müqaviləsindən imtina etdiyini bəyan edib.

Hadisələrin fitili Hondanın “X” sosial platformasında paylaşdığı postla alışıb. O, 2026-cı ildə keçiriləcək FIFA Dünya Çempionatı barədə danışarkən, İran milli komandasının turnirdə iştirakına tərəfdar olduğunu bildirib: “Bunun kifayət qədər həssas bir mövzu olduğunun fərqindəyəm. Lakin mən şəxsən İranın Dünya Çempionatında mübarizə aparmasını istəyirəm”.

Bu açıqlama idman ictimaiyyətində geniş müzakirələrə səbəb olsa da, okeanın o tayındakı biznes tərəfdaşları soyuq qarşılayıb. Məlum olub ki, futbolçunun bu səmimi bəyanatından sonra bir Amerika brendi onunla olan reklam əməkdaşlığını dərhal dondurmaq qərarı alıb. Lakin Honda bu addım qarşısında geri çəkilməyib. Əksinə, o, şirkətin bu yanaşmasını kəskin tənqid edərək, idmanın birləşdirici gücünü xatırladıb: “Görünən odur ki, İran seçməsinə verdiyim dəstəyə görə həmin şirkət reklam kampaniyasını dayandırıb. Belə dəhşətli və qərəzli qərarlar verən şirkətlərə bizim ehtiyacımız yoxdur. Onlarsız dünya daha yaxşıdır,” – deyə ulduz futbolçu bildirib.

2024-cü ilin sonunda peşəkar futbolçu karyerasını rəsmən bitirməyi planlaşdıran Honda, illərdir həm Avropada, həm də Cənubi Amerikada nümayiş etdirdiyi peşəkarlığı indi də öz vətəndaş mövqeyi ilə sübut edir. O, Yaponiya yığmasının heyətində meydana çıxdığı 98 qarşılaşmada 37 qola imza ataraq “Gündoğar ölkə”nin futbol tarixinə adını qızıl hərflərlə yazdırıb.