Premyer Liqanın 25-ci turunda səfərdə “Neftçi”yə 0:6 hesabı ilə uduzan “İmişli”nin baş məşqçisi Jorje Kaşkilya oyunsonrası mətbuat konfransına qatılıb. Ağır məğlubiyyəti şərh edən mütəxəssis azarkeşlərdən üzr istəyərək komandanın gələcək planlarından danışıb.

Portuqaliyalı mütəxəssis ilk növbədə azarkeşlərdən üzr istəyərək məğlubiyyətin günahkarı kimi özünü göstərib: “ Bütün məsuliyyət və günah mənim üzərimdədir. Təbii ki, hazırda komandada əhval-ruhiyyə çox aşağıdır. Rəqibimiz “Neftçi”ni qələbə münasibətilə təbrik edirəm”.

Ötən tur “Sabah”dan 5, bu tur isə “Neftçi”dən 6 qol buraxan komandanın növbəti rəqibi “Turan Tovuz”dur. Jurnalistin “Növbəti oyunda 7 qol buraxmağa hazırsınızmı?” sualına baş məşqçinin reaksiyası kəskin olub: “Bu cür sual verməklə baş məşqçiyə qarşı hörmətsizlik nümayiş etdirirsiniz”.

Turnir cədvəlində “Kəpəz”in onlara yaxınlaşması və elitanı tərk etmək təhlükəsi ilə bağlı sualı cavablandıran Kaşkilya, gələcəyə nikbin baxdığını bildirib: “Premyer Liqada qalacağımıza tam əminəm. Bu məsələdə heç vaxt şübhəm olmayıb. Toparlanmalı və gücümüzü bərpa etməliyik. Məqsədimizə doğru doğru yolla getməyə davam edəcəyik”.