Tbilisinin meri və “Milan”ın əfsanəvi müdafiəçisi Kaxa Kaladze La Gazzetta dello Sport-a müsahibəsində 2008-ci ilin avqust hadisələri ilə bağlı gizli qalan məqamlara toxunub. O, mərhum siyasətçi Silvio Berluskoninin Gürcüstanda sülhün bərqərar olmasındakı rolunu açıqlayıb.
Kaladze bildirib ki, müharibənin ən gərgin vaxtında Berluskonidən kömək istəyib: “2008-ci ildə ölkədə vəziyyət çox ağır idi. Mən Berluskoninin yanına getdim və ondan Rusiya prezidenti ilə olan yaxın münasibətlərindən istifadə edərək prosesə müdaxilə etməsini xahiş etdim. O, mənim gözlərim qarşısında Putinə zəng vurdu. Çox keçmədi ki, tərəflər arasında sülh sazişi imzalandı”.
Keçmiş futbolçu Berluskonini həm də böyük şəxsiyyət kimi xarakterizə edib. Kaladzenin sözlərinə görə, onun siyasətə gəlməsində və bir lider kimi formalaşmasında “Milan”ın sabiq prezidentinin böyük təsiri olub. O, Berluskonini təkcə bacarıqlı sahibkar və dövlət adamı deyil, həm də xeyirxah bir insan kimi xatırladığını vurğulayıb.