Qış transfer pəncərəsində heyətini gücləndirmək istəyən “Qalatasaray” gözlənilməz addım atıb. “Sarı-qırmızılılar”ın, “Fənərbaxça”nın da hədəfində olan “İnter”in ulduzu Davide Frattesi üçün mübarizəyə qoşulduğu və transferi bitirməyə yaxın olduğu bildirilir.
Yarımmüdafiə xəttini möhkəmləndirməyi hədəfləyən “Qalatasaray” bu zonaya iki yeni oyunçu cəlb etməyi planlaşdırır. Klubun diqqət mərkəzində İtaliya çempionatıdır. İtaliyanın bir çox idman qəzetləri “Qalatasaray”ın “İnter”də çıxış edən Frattesi ilə maraqlandığını manşetlərə daşıyıb. Xəbərlərdə “Fənərbaxça”nın da bu transferdə maraqlı olduğu, lakin “Qalatasaray”ın müqaviləni bu ay ərzində bağlama ehtimalının daha yüksək olduğu vurğulanır.
26 yaşlı yarımmüdafiəçinin adı bir müddətdir “Yuventus”la da hallanırdı. İki klub arasında qış fasiləsində barter və ya transfer əməliyyatının keçiriləcəyi müzakirə edilsə də, danışıqlarda bəzi problemlərin yarandığı və tərəflərin digər variantlara yönəldiyi qeyd olunur. “Qalatasaray”ın isə bu prosesi yaxından izlədiyi və futbolçu tərəfindən gələn müsbət siqnalların İstanbul təmsilçisində məmnunluqla qarşılandığı bildirilir.