Azərbaycan Futbol Federasiyaları Assosiasiyası (AFFA), “Neftçi”nin son vaxtlar hakim qərarları ilə bağlı səsləndirdiyi etirazlara rəsmi bəyanatla cavab verib. Milli assosiasiya klubu ictimai rəylə manipulyasiya etməməyə və mübahisəli məqamları masada həll etməyə çağırıb.

Manipulyasiyaya yol verilməməlidir

AFFA-nın rəsmi saytında yer alan bəyanatda bildirilir ki, Misli Premyer Liqasının 2025/2026-cı illər mövsümündə “Neftçi” tərəfindən yayılan açıqlamalar reallığı təhrif edir. Qurum vurğulayır ki, şəxsi maraqlardan irəli gələrək oyun epizodlarının səhv qiymətləndirilməsi və spekulyativ məlumatların yayılması futbol mühitinə zərər verir.

Klub rəsmiləri AFFA-ya dəvət olundu

AFFA yaranmış gərginliyi aradan qaldırmaq üçün konkret addım atıb. Hakimlər Komitəsi klubun təqdim etdiyi bütün mübahisəli epizodları peşəkar və hüquqi çərçivədə müzakirə etməyə hazırdır. “Neftçi”nin nümayəndələri epizodların detallı təhlili və sualların cavablandırılması üçün assosiasiyaya dəvət ediliblər.

Qaydalar nə deyir? (VAR-a baxış hüququ)

Bəyanatda klublara xatırladılıb ki, ötən ilin sonunda qəbul edilmiş qərara əsasən, hər bir klubun mövsüm ərzində 3 dəfə mübahisəli epizodlarla bağlı VAR yazılarına baxış üçün rəsmi müraciət etmək hüququ var. Bu mexanizm məhz şəffaflığı təmin etmək üçün yaradılıb.

Birtərəfli açıqlamalardan çəkinin

AFFA ölkə futbolunun ali idarəedici qurumu olaraq bütün klublara çağırış edib: “Bütün klubları birtərəfli açıqlamalardan və emosional ritorikadan çəkinməyə çağırırıq. Sağlam futbol mühiti üçün institusional dialoq, qarşılıqlı hörmət və əməkdaşlıq prinsipləri əsas götürülməlidir”.