Aprelin 8-dən 12-nə kimi Portuqaliyanın Portiman şəhəri batut gimnastikası və tamblinq üzrə Avropa çempionatına ev sahibliyi edəcək. Millimiz turnirə iddialı və geniş heyətlə yollanır.
Portuqaliyada keçiriləcək builki qitə birinciliyi Azərbaycan gimnastikası üçün xüsusi əhəmiyyət kəsb edir. Ölkəmizi bu mötəbər yarışda həm təcrübəli ulduzlar, həm də perspektivli gənclərdən ibarət 25 nəfərlik böyük heyət təmsil edəcək.
Gimnastlarmızın ən güclü olduğu növlərdən biri sayılan tamblinq üzrə yarışlarda əsas diqqət dünya çempionu Mixail Malkinə yönələcək. Son illərdə beynəlxalq arenada parlaq çıxışları ilə seçilən Malkin bu turnirin də əsas favoritlərindən biri hesab olunur. Ona Dünya Oyunlarının gümüş mükafatçısı Tofiq Əliyev yoldaşlıq edəcək. Bu iki idmançının həm fərdi, həm də komanda hesabında yüksək nəticələr göstərəcəyi gözlənilir.
Batut gimnastikası üzrə yarışlarda Azərbaycanın əsas ümidi, “Paris-2024” Yay Olimpiya Oyunlarına lisenziya qazanaraq tarix yazan Selcan Mahsudovadır. Yığmanın lideri üçün Portiman turniri Olimpiada öncəsi mühüm hazırlıq mərhələsi və rəqiblərin formasını yoxlamaq üçün əla fürsətdir.
Milli komandamız Portuqaliyada təkcə böyüklər arasında deyil, həm də gənclər kateqoriyasında gücünü sınayacaq. İdmançılarımız dörd gün davam edəcək yarış marafonunda: fərdi çıxışlar, sinxron proqramlar və komanda yarışları üzrə medallar uğrunda mübarizə aparacaqlar.