Noyabrın 20-də FIFA-nin internet səhifəsində DÇ-2026-nı təbliğ edən “48 komanda, 1 arzu” başlığı altında poster yerləşdirilib. Şəkildə Portuqaliya millisinin təmsilçisi kimi Kriştiano Ronaldo deyil, Bruno Fernandeş yer alıb. Bu isə 40 yaşlı Ronaldonun fanatlarının böyük qəzəbinə səbəb olub. Onlar bunu sevimli oyunçularına qarşı etinasızlıq kimi qarşılayıb və FIFA-nin səhifəsini qəzəbli şərhlərlə bombardman ediblər.
Bir müddət sonra həmin poster silinib və yerində başqa birisi peyda oldu. Yeni şəkildə “Əl-Nəsr”in ulduz oyunçusu Ronaldo ilə yanaşı Dünya Kubokunu tutan Lionel Messi və sonuncu mundialda Portuqaliyanı mübarizədən kənarlaşdıran Yusif En-Nesiri yer alıb. Bu isə Kriştianonun azarkeşləri üçün heç də təəccüb doğurmayıb. Görünür FİFA Messi və En-Nesirini önə çəkməklə onlara susmağı məsləhət görüb.
