Transfer bazarında ard-arda addımlar atan “Fənərbaxça”, futbol dünyasında əks-səda doğuracaq bir keçidə imza atdı. Uzun müddətdir danışıqlar aparılan fransız ulduz N’Qolo Kante ilə 2.5 illik rəsmi müqavilə imzalandı və bu barədə Türkiyə Futbol Federasiyasına (TFF) məlumat verildi.

Məlumata görə, Kantenin transferi son anda ciddi problemlər səbəbindən ləğv olunmaq təhlükəsi ilə üzləşib. Lakin Türkiyə Prezidenti Rəcəb Tayyib Ərdoğanın prosesə birbaşa müdaxiləsi vəziyyəti kökündən dəyişib. Prezidentin dəstəyi ilə maneələr sürətlə aradan qaldırılıb və “sarı-lacivərdlilər” ulduz futbolçunu heyətinə qata bilib.

Kantenin lisenziyasını çıxarmaq üçün klub texniki bir addım da atıb. Mərakeşli hücumçu Youssef En-Nesyri ilə müqavilə qarşılıqlı razılaşma əsasında ləğv edilib. Bu boşluqdan dərhal sonra TFF Kantenin lisenziyasını rəsmən təsdiqləyib.Fransız yarımmüdafiəçinin bu axşam (saat 21:30-da) Sabiha Gökçen Hava Limanına eniş edəcəyi gözlənilir. O, sabah səhər tibbi müayinədən keçdikdən sonra “Fənərbaxça” ilə rəsmi müqavilə mərasiminə qatılacaq.