İsveçrənin Davos şəhərində keçirilən Dünya İqtisadi Forumu (WEF) bu il yalnız iqtisadi və siyasi müzakirələrlə deyil, həm də futbol dünyasının tanınmış simalarının sürpriz iştirakı ilə yadda qalıb. FİFA prezidenti Canni İnfantino və əfsanəvi futbolçu Stiven Cerrardın forumda görünməsi iştirakçılar tərəfindən böyük maraqla qarşılanıb.

İnfantinodan “Sehrli Top” Mühazirəsi

FİFA prezidenti Canni İnfantino forumdakı çıxışı zamanı futbolun qlobal birləşdirici gücündən bəhs edib. O, əlindəki futbol topunu auditoriyaya nümayiş etdirərək emosional bir nitq söyləyib: “Siz elə bilirsiniz ki, bu, sadəcə bir topdur? Xeyr, bu, insanları xoşbəxt edən sehrli bir alətdir. Onun sayəsində uşaqlar sevinir, böyüklər isə uşaqlıq illərinə qayıdırlar. Baxın, bu zalda nə qədər təbəssüm var! Biz belə çətin dövrlərdə sevinməyi və xoşbəxt olmağı unuduruq“.

Siyasi marafonun ortasında futbol əfsanəsi

Forumun digər sürpriz qonağı isə İngiltərə futbolunun əfsanəsi Stiven Cerrard olub. Cerrard dünya liderlərinin Avropanın gələcəyini və Qrenlandiya ilə bağlı məsələləri müzakirə etdiyi gərgin diplomatik mühitdə görünüb. Onun qlobal siyasi platformadakı iştirakı idmanla siyasətin kəsişmə nöqtəsi kimi qiymətləndirilib.