Peşəkar Futbol Liqasının (PFL) rəsmi məlumatına görə, “Qarabağ” klubunun müdafiəçisi Bəhlul Mustafazadənin Almaniyanın “Ayntraxt” (Frankfurt) komandasına vurduğu qol Azərbaycan klublarının UEFA Çempionlar Liqasındakı yubiley — 150-ci qolu kimi tarixə düşüb.

UEFA Çempionlar Liqasının əsas mərhələsinin VII turu çərçivəsində Bakıda keçirilən qarşılaşmada Bəhlulun vurduğu bu top, həm də komandasına 3:2 hesablı qələbə qazandıran həlledici qol olub.

Bu yubiley qolu ilə Azərbaycan təmsilçilərinin turnirin həm təsnifat, həm də əsas mərhələləri daxil olmaqla keçirdiyi 116 matçdakı ümumi qol sayı 150-yə çatıb.

İndiyədək Azərbaycanı bu mötəbər turnirdə təmsil edən və qol sevincini bölüşən klubların siyahısı:

“Qarabağ” – 110 qol

“Neftçi” – 18 qol

“Bakı” – 7 qol

“Şəmkir” – 6 qol

“Kəpəz” – 4 qol

“İnter” – 3 qol

“Xəzər Lənkəran” – 2 qol

Vurulan 150 qolun 135-i təsnifat və pley-off, 15-i isə əsas mərhələlərin (qrup və liqa formatı) payına düşür.

Xatırladaq ki, Azərbaycan klublarının Çempionlar Liqasındakı ilk qolunu İmamyar Süleymanov vurub. O, 1998-ci il iyulun 22-də keçirilən LKS (Polşa) – “Kəpəz” matçında (4:1) fərqlənib.