Premyer Liqanın 33-cü turunda “Neftçi”yə minimal hesabla (0:1) məğlub olan “Kəpəz”in baş məşqçisi Azər Bağırov oyunsonrası mətbuat konfransında fikirlərini bölüşüb.

Gənc futbolçulara şans verməkdən məmnun olduğunu bildirən mütəxəssis, komandanın gələcəyi üçün bunun vacib olduğunu vurğulayıb: “Gənclərə daha çox meydanda olmaq şansı tanıdığım üçün sevinirəm. İnanıram ki, onlar gələcəkdə ölkə futbolunun aparıcı simalarından birinə çevriləcəklər. Lakin bunun üçün hələ çox çalışmaq lazımdır. Meydanda ciddi mübarizə getdi və hər kəs bacardığını etməyə çalışdı. Çətin bir mövsümü geridə qoyduq. Komandaya mövsümün gedişində qoşulmuşdum və ən azından son iki pillədə qərarlaşmadığımız üçün şadam”.

Bağırov baş məşqçi postundakı gələcəyi ilə bağlı suallara da aydınlıq gətirib. O, hazırkı klub rəhbərliyi ilə münasibətlərinin yüksək səviyyədə olduğunu qeyd edib: “Gələcəyimlə bağlı qərarı yaxın zamanda ictimaiyyətə açıqlayacağıq. Rəhbərliklə münasibətlərimiz çox yaxşıdır və onlar mənə komandada qalmağı təklif ediblər. Hazırda bir neçə variantı dəyərləndirirəm, hətta indiki işimdən daha yaxşı təklifim də var. Hələ ki, qəti qərar verə bilmirəm, çünki iş prosesində müəyyən disbalanslar var. Bir çox məqamlara aydınlıq gəldikdən sonra son qərarımı bildirəcəyəm”.