“Şamaxı”nın baş məşqçisi Ayxan Abbasov Premyer Liqanın 26-cı turu çərçivəsində “Zirə” ilə baş tutan gərgin qarşılaşmadan (1:1) sonra fikirlərini bölüşüb. Mütəxəssis azlıqda qalmalarına baxmayaraq xal qazanmağı uğurlu nəticə kimi qiymətləndirib.

Oyunun həm taktiki, həm də psixoloji baxımdan ağır keçdiyini qeyd edən Abbasov, matçın gedişatını belə şərh edib: “Olduqca maraqlı və gərgin bir mübarizə izlədik. İlk hissəni daha çox ‘taktiki döyüş’ adlandırmaq olar. Təəssüf ki, Balau əlinə düşən fürsəti dəyərləndirə bilmədi. Rəqibin fasilədən sonra dəyişikliklər edəcəyini bilirdik, lakin ikinci hissənin elə ilk dəqiqələrində aldığımız qırmızı vərəqə planlarımızı alt-üst etdi, bizi hazırlıqsız yaxaladı”.

Baş məşqçi komandasının xarakter nümayiş etdirdiyini xüsusi vurğulayıb: “Qol buraxdıqdan sonra komanda dağılmadı, əksinə, sona qədər mübarizə apararaq şansını qorudu. Bir çox matçlarda məhz bu iradə çatışmırdı və nəticədə ikinci qolu buraxırdıq. “Zirə” kimi intizamlı bir rəqibə qarşı azlıqda mübarizə aparıb xal qazanmaq böyük uğurdur. Hesab edirəm ki, “Şamaxı” bu mövsüm öz imkanlarından daha yüksək performans sərgiləyərək ‘boyundan yuxarı tullanmağı’ bacarıb”.

Yaranmış kadr böhranı “Qarabağ”la çətin sınaq öncəsi Ayxan Abbasovu ciddi seçim qarşısında qoyub. Həm özünün, həm də aparıcı futbolçuların diskvalifikasiyasına toxunan mütəxəssis, komandadakı kadr qıtlığını bir qədər də ironik şəkildə ifadə edib: “Rossi və Balau ilə yanaşı, mən də cəzalıyam. Hazırda heyətlə bağlı elə bir durumdayıq ki, əsas dərdimiz növbəti matç üçün meydana çıxarmağa 11 futbolçu komplektləşdirməkdir”.