Premyer Liqanın XXXII turunda doğma meydanda “Turan–Tovuz”u gərgin mübarizənin sonunda 3:2 hesabı ilə məğlub edən “Şamaxı”nın baş məşqçisi Ayhan Abbasov qarşılaşmadan sonra mətbuat konfransında qatılıb.

O, mövsümün son ev oyununda qazanılan 3 xalı şərh edib və komandasının performansından razılığını ifadə edib: “Doğma azarkeşlərimiz önündə çıxdığımız mövsümün son ev oyununda xallar qazanmaq, azarkeşlərimizi sevindirmək istəyirdik. Şükürlər olsun ki, istəyimizə çatdıq və meydandan qələbə ilə ayrıldıq. Ümumiyyətlə, ‘Turan–Tovuz’la oyunlarımız həmişə gərgin və maraqlı mübarizəyə səhnə olur. Səhv etmirəmsə, bu, rəqib üzərində qazandığımız ilk qələbədir. Bu tarixi qələbədə payı olan hər kəsə, xüsusən də bizi tək qoymayan azarkeşlərimizə təşəkkür edirəm”.

Mövsüm boyu komandanın böyük güc sərf etdiyini vurğulayan Abbasov, yetirmələrinin fədakarlığını xüsusi qeyd edib: “Qarşıda bizi çempionatın son oyunu gözləyir. Əgər həmin matçda da xal və ya xallar qazana bilsək, mövsümü tam istədiyimiz kimi bitirmiş olacağıq. Klubdakı hər bir əməkdaşa ayrıca minnətdaram. Futbolçularım bu ağır və sıx qrafikdə heç vaxt ruhdan düşmədilər, sona qədər döyüşdülər. Çoxu öz oyununu inkişaf etdirdi və artıq böyük hədəfləri olan, iddialı klubların transfer siyahısına düşməyi bacardılar. Hər birinə uğurlar arzulayıram”.