“Ayaks” klubunun baş məşqçisi Con Heytinqa vəzifəsindən azad edilib. Bu barədə klubun rəsmi saytı məlumat yayıb. 2027-ci ilin yayına kimi nəzərdə tutulmuş müqavilə klubun təşəbbüsü ilə ləğv edilib.

“Bu, ağrılı qərardır. Amma son aylara baxanda etiraf etməliyik ki, hər şey düşündüyümüz kimi getmədi. İrəliləyiş çox zəifdir və biz səbəbsiz yerə xallar itiririk. Bilirik ki, heyətində dəyişikliklər baş vermiş komandaya uyğunlaşmaq yeni məşqçi üçün vaxt tələb edə bilər. Biz Cona bu zamanı verdik, amma hesab edirik ki, klub üçün baş məşqçi vəzifəsinə başqa birisini təyin etmək daha yaxşıdır. Ümid edirik ki, yeni baş məşqçini tezliklə təqdim edə biləcəyik. Conun göstərdiyi səylərə görə ona təşəkkür edir və uğurlar arzulayırıq”, — deyə klubun texniki direktoru Aleks Krus mətbuat xidmətinə müsahibəsində bildirib.

Con Heytinqa 2025-ci ilin iyulunda “Ayaks”ın baş məşqçisi olmuşdu. Bu, keçmiş futbolçu üçün böyüklər komandasına rəhbərlik etdiyi ilk təcrübə idi. O, daha əvvəl Amsterdam klubunun yeniyetmə və gənclər komandalarını çalışdırmış, 2024-cü ilin iyulundan 2025-ci ilin mayına qədər isə “Liverpul”un baş məşqçisi Arne Slotun köməkçisi olmuşdu. “Ayaks” Niderland çempionatında 11 oyunda 20 xalla dördüncü yeri tutur və lider “Feyenoord”dan səkkiz xal geri qalır.