Braziliya futbolunun ulduzu Neymar, Fransa və Xorvatiya ilə keçiriləcək yoldaşlıq oyunları üçün milliyə dəvət almamasına sərt reaksiya verib. Təcrübəli hücumçu yaranmış vəziyyəti “kədərli və məyusedici” adlandıraraq, qərardan narazılığını gizlətməyib.

Braziliya yığmasının sükanı arxasında olan Karlo Ançelotti ulduz futbolçunun heyətə daxil edilməməsini onun hazırkı fiziki durumu ilə əlaqələndirib. İtaliyalı mütəxəssis Neymarın hələ tam bərpa olunmadığını vurğulayıb: “Neymar hazırda 100 faiz hazır deyil. Əvvəlki formasına qayıtması üçün mütəmadi oyun praktikasına ehtiyacı var”.

Açıqlanan 25 nəfərlik geniş heyətdə Alisson, Ederson, Markinyos, Kazemiro və Vinisius Junior kimi ulduzlarla yanaşı, Qabriel Sara kimi diqqətçəkən adlar yer alıb. Lakin bütün diqqətlər siyahıdan kənarda qalan Neymarın üzərində cəmlənib.

Hazırda formasını bərpa etməyə çalışan futbolçu məyus olsa da, ruhdan düşmədiyini bildirib. O, əsas diqqətini məşqlərə yönəltdiyini və növbəti çağırışda mütləq milli komandada yer alacağını qeyd edib: “Heyətdə olmadığım üçün kədərliyəm, amma işimə davam edirəm. Məqsədimizə birlikdə çatacağıq”.