AFFA İntizam Komitəsinin növbəti iclası keçirilib. İclasın qərarlarına əsasən, Premyer Liqanın 16-cı turu və aşağı liqalarda baş verən qayda pozuntularına görə klublara qarşı sərt maliyyə sanksiyaları tətbiq olunub.

Ən böyük cərimə və sanksiya “Qəbələ” klubuna kəsilib. Baş məşqçi Kaxaber Tsxadadze “Qarabağ”la matçda hakimləri təhqir etdiyi üçün 4 oyunluq diskvalifikasiya olunub, klub isə bu hərəkətə görə 10 000 manat cərimələnib. Bundan əlavə, futbolçuların sarı vərəqə limitini aşması “radarlar”a daha 700 manata başa gəlib.

“Kəpəz”: Azarkeşlərin hakimləri kütləvi şəkildə təhqir etməsinə görə 7 000 manat, oyundan sonra meydana kənar şəxslərin daxil olmasına görə isə 2 500 manat (cəmi 9 500 AZN).

“Karvan-Yevlax”: Meydana kənar şəxslərin daxil olması (mövsümdə ikinci hal) üçün 5 000 manat, çoxsaylı sarı vərəqələr üçün isə 700 manat cərimə kəsilib.

“Qarabağ”: Azarkeşlərin pirotexnikadan istifadə etməsinə görə klub 5 000 manat ödəməli olacaq.

“Neftçi”: Azarkeşlərin sahəyə kənar əşyalar atması səbəbindən klub 4 000 manat cərimələnib. Həmçinin, paytaxt təmsilçisi “Karvan-Yevlax”ın avtobusuna dəymiş ziyanı ödəməyə borclu edilib.

“Araz-Naxçıvan”: Təcili yardım maşınının stadiona gecikməsi üzündən klub 2 000 manat cərimələnib.

“Sumqayıt”: Futbolçuların vərəqə limitini aşması klubun büdcəsini 700 manat azaldıb.

İntizam Komitəsi tərəfindən 1-ci və 2-ci Liqa klubları da diqqətdən kənarda qalmayıb. 1-ci liqa klubları 12-ci turun oyunlarındakı pozuntularına görə ümumilikdə 1 980 manat cərimə tətbiq edilib.

2-ci liqa klublarına isə 14-cü turun oyunlarında qeydə alınan qayda pozuntuları üçün ümumilikdə 1 690 manat cərimə kəsilib.