“Qarabağ”ın polşalı qolkiperi Mateuş Koxalski Polşanın “Sport.pl” nəşrinə geniş müsahibə verib. O, komandanın Çempionlar Liqasındakı (ÇL) tarixi çıxışı, Bakıdakı çətinlikləri və gələcək planları barədə səmimi açıqlamalarla çıxış edib.
“Qarabağ”ın 25 yaşlı qapıçısı Mateuş Koxalski geridə qalan gərgin mövsümü dəyərləndirib. Çempionlar Liqasında həm parlaq qələbələr, həm də ağır məğlubiyyətlər yaşayan polşalı əlcək sahibi, Ağdam klubundakı karyerası və şəxsi emosiyaları ilə bağlı diqqətçəkən məqamlara toxunub.
“Lissabondakı debütümü heç vaxt unutmayacağam”
Koxalski üçün Çempionlar Liqası macərası Lissabonda “Benfika” üzərindəki dramatik qələbə (3:2) ilə başlayıb. O, həmin anı belə xatırlayır: “Həmin gün yaddaşıma əbədi həkk olunub. Matçın startında 0:2 geridə olanda əsəbimdən əllərimi yerə çırpırdım. Amma biz sübut etdik ki, bu səviyyədə oynamağa layiqik. Heç kim bizdən belə sıçrayış gözləmirdi, bəlkə də uğurumuzun sirri üzərimizdə təzyiqin olmaması idi”.
Xatırladaq ki, “Köhlən atlar” qrup mərhələsində “Kopenhagen” (2:0) və “Ayntraxt”ı (3:2) məğlub edərək, “Çelsi” ilə heç-heçə (2:2) oynamaqla Avropanı təəccübləndirməyi bacarıb.
“30 qol mənim üçün kabus idi”
Uğurlu çıxışa baxmayaraq, “Qarabağ” turnirdə 30 qol buraxaraq yeni antirekorda imza atıb. Koxalski bu rəqəmdən narahatlığını gizlətmir: “Mənim üçün bu, əsl kabus idi. Xüsusən də “Liverpul” (0:6) və “Nyukasl”la (1:6) oyunları xatırlamaq istəmirəm. Həmin matçlarda özümü çarəsiz hiss edirdim. Rəqiblər o qədər sürətli və aqressiv idilər ki, onların niyə dünyanın ən yaxşısı olduqlarını və niyə o qədər qazandıqlarını meydanda anladıq”.
Qurban Qurbanov fenomeni və “Yagelloniya” müqayisəsi
Polşalı qapıçı “Qarabağ”ın illərdir davam edən sabitliyini baş məşqçi amili ilə əlaqələndirib: “Polşada çoxları “Qarabağ”ın necə belə uğurlu olduğunu soruşur. Cavab bəsitdir: 18 ildir klubda olan Qurban Qurbanov. Burada inanılmaz skautinq sistemi var. Onlar ulduz yox, komandaya uyğun oyunçu axtarırlar. Əgər Polşa klubları ilə müqayisə etsəm, “Qarabağ”ı “Yagelloniya”ya bənzədərdim – az büdcə, ağıllı skautinq və maksimum nəticə”.
Bakıdakı tənhalıq və “Vidzev”ə keçid cəhdi
Koxalski Azərbaycan paytaxtındakı həyatından da söz açıb. O, Bakının kənarında daha sakit bir ərazidə yaşasa da, ailə həsrətinin ona çətin anlar yaşatdığını etiraf edib: “Mən burada tək yaşayıram. Ev, məşq, oyun – bu qapalı dövrə məni yorurdu. Qışda Polşanın “Vidzev” klubundan təklif alanda qayıtmağa hazır idim. Hətta Çempionlar Liqasını qurban verməyə də razıydım. Lakin “Qarabağ” bu transferi blokladı. Mən peşəkaram, müqaviləm var və sona qədər mübarizə aparmalıyam”.
Gələcək hədəf: Premyer Liqa və Polşa millisi
Gənc qolkiper gələcək planlarından danışarkən ambisiyalı olduğunu nümayiş etdirib: “Arzum İngiltərə Premyer Liqasında oynamaqdır. MLS-dən gələn təklifləri məhz Avropada qalmaq üçün rədd etdim. Ehtiyat skamyada oturmaq niyyətim yoxdur, mən bir nömrə olmaq istəyirəm. Eyni zamanda Polşa millisinin qapısı üçün hələ də iddialıyam. İnanıram ki, düzgün inkişaf yolu ilə buna nail olacağam”.