Ölkəmizin batut gimnastikası üzrə yığma komandası Niderlandın Alkmaar şəhərində keçirilən Dünya Kubokunda növbəti uğurlarına imza atıb. Yarışın fərdi proqramında çıxış edən idmançılarımız günü 3 medalla başa vurublar.

Turnirin fərdi yarışlarında həm qadınlar, həm də kişilər arasında Azərbaycan himni sədalanıb:

Səlcan Mahsudova.  Qadınlar arasında keçirilən fərdi proqramda bütün rəqiblərini geridə qoyaraq fəxri kürsünün ən yüksək pilləsinə qalxıb və qızıl medal qazanıb.

Maqsud Mahsudov. Kişilərin mübarizəsində yüksək texnika nümayiş etdirərək komandamızın aktivinə növbəti qızıl medalı yazdırıb.

Hüseyn Abbasov.  Gərgin keçən final mərhələsində uğurlu çıxışı ilə bürünc medala sahib çıxıb.

Xatırladaq ki, yarışın əvvəlki günlərində gimnastlarımız artıq 2 medal (1 gümüş və 1 bürünc) qazanmışdılar. Beləliklə, Azərbaycan gimnastları Alkmaar Dünya Kubokunu ümumilikdə yüksək nailiyyətlərlə tamamlayıblar.