Premyer Liqanın 24-cü turunda səfərdə “Araz-Naxçıvan”a 1:2 hesabı ilə uduzan “Karvan-Yevlax”da məğlubiyyətin üzüntüsü yaşanır. Qarşılaşmadan sonra media mənsublarının suallarını cavablandıran bölgə təmsilçisinin baş məşqçisi Fizuli Məmmədov, komandasının oyununu və buraxılan qolların səbəblərini aydınlıq gətirməyə çalışıb. Məşqçi xüsusilə ilk yarıdakı konsentrasiya itkisinin nəticəyə birbaşa təsir etdiyini vurğulayıb.

Məmmədov qeyd edib ki, komanda meydana qələbə əzmi ilə çıxsa da, planlar ilk yarıda pozulub: “Oyuna çox ciddi hazırlaşmışdıq. Ən azı uduzmayacağımızı, hətta qələbə qazanacağımızı düşünürdük. Təəssüf ki, ilk hissədə yol verdiyimiz iki ciddi səhv işimizi çətinləşdirdi. Belə rəqibə qarşı iki top geridə olandan sonra geri dönüş etmək böyük güc tələb edir”.

İkinci hissədə oyunun simasının dəyişdiyini vurğulayan baş məşqçi, ikinci qolu vura bilməmələrinin səbəblərinə də toxunub: “Fasilədən sonra daha aqressiv futbol sərgilədik, ön xətdə təzyiqi artırdıq və bir qol vura bildik. Etiraf etmək lazımdır ki, ‘Araz-Naxçıvan’ kimi nizamlı komandaya 2-3 qol vurmaq olduqca çətindir. Hesabı bərabərləşdirmək üçün əlimizə düşən fürsətlər zamanı  yanlış qərarlarmız ikinci topu vurmağımıza mane oldu”.