“Sabah”ın baş məşqçisi Valdas Dambrauskas Premyer Liqanın 20-ci turu çərçivəsində keçirilən “Qəbələ” ilə oyundan (1:0) sonra mətbuat konfransında oyunla bağlı fikirlərini bölüşüb.Qazanılan çətin qələbəni şərh edən litvalı mütəxəssis rəqibin oyununu yüksək qiymətləndirib:
“Məşqçi işinin aydın hiss olunduğu “Qəbələ” çox yaxşı komandadır. Onların turnir cədvəlinin aşağı pillələrində qərarlaşması real potensiallarını əks etdirmir. Onların müdafiə səddini yarmaq bizim üçün olduqca çətin oldu. İkinci hissənin ilk 20-25 dəqiqəsində yaxşı futbol oynadıq, lakin son 10 dəqiqə bizim üçün çox ağır keçdi. Düşünürəm ki, rəqib bu oyunda 1 xal qazanmağa layiq idi. Bu gün qapıçımız seyvləri ilə bizi real qoldan xilas etdi”.
Komandanın birinci pillədə qərarlaşmasının yaratdığı psixoloji təzyiq haqqında danışan Dambrauskas, diqqəti yalnız növbəti oyunlara yönəltdiklərini bildirib:
“Biz komanda ilə razılığa gəlmişik ki, turnir cədvəlinə baxmayaq. Yalnız hər növbəti oyun haqqında düşünürük. Məqsədimiz xalları hesablamaq deyil, oyunumuzu təkmilləşdirmək və yol verdiyimiz səhvləri düzəltməkdir”.
Avrokubok iştirakçılarının oyunlarının təxirə salınması mövzusuna toxunan baş məşqçi, tarazlığın qorunmasının vacibliyini vurğulayıb:
“Litvada da bəzən belə hallar olur. Bu, bizim idarə edə biləcəyimiz bir məsələ deyil, əsas işimiz oyunlarımıza köklənməkdir. “Qarabağ”ı anlamaq olar, onlar tarixi uğur qazanıblar. Lakin eyni zamanda daxili çempionatı da unutmaq olmaz. Bu məsələlərin tənzimlənməsi ilə turniri təşkil edən qurumlar məşğul olmalıdır”.
Püşkə əsasən eyni qrupda yer alan Azərbaycan və Litva millilərinin şanslarını dəyərləndirən Dambrauskas, əsas mübarizənin məhz bu iki komanda arasında keçəcəyini qeyd edib:
“Bolqarıstan və Kiprdə işlədiyim vaxtlarda da hər dəfə Litva millisi rəqib qrupunda olurdu. İndi eyni hal Azərbaycanda təkrarlanır. Lixtenşteynə hörmətim sonsuzdur, lakin qrupun taleyi Azərbaycan və Litva arasındakı mübarizədən asılı olacaq. Şanslar heyətlərin optimal olub-olmamasından asılıdır. Litva millisinin çoxlu legioneri var və onların oyun zamanı hansı formada olacağı həlledici rol oynayacaq. Azərbaycan millisinin də güclü oyunçuları var. Mənim köməyimə gəlincə, müasir futbolda rəqib haqqında məlumat tapmaq çox asandır, ona görə də Litvaya xüsusi köməyim lazım olmayacaq”.